Сеулската Н кула и љубовните катанчиња

Во самиот центар на Сеул се издига „планина“ висока околу 262 метри наречена Намсан. На неа гордо се извишува едно од обележјата на оваа метропола- Сеулската Н кула или едноставно Сеулската кула. Тоа што ја прави оваа кула толку посебна и вредна за посета е прекрасниот поглед на буквално целиот град. Навечер ова обсервациско место е преполно со млади парови и туристи кои опуштено уживаат во магичната глетка на точките светло од улиците, движењето на светлата од автомобилите и раѓањето на месечината. Покрај прекрасната глетка, кај Сеулската кула има  и многу атракции како „Музејот на плишени мечиња“, жичарата, рестораните и кафулињата, видиковецот на врвот на кулата итн. 

Палатата Gyeongbokgung (경복궁)

Во срцето на Сеул, затскриен со планините Bugaksan и Namsan, опкружен со модерни облакодери се наоѓа споменик кој суптилно говори за своето патување низ историјата. Палатата Gyeongbokgung, сега веќе туристичка атракција, била мета на историските турбуленции кои поминале низ оваа област. Но сè уште блеска во полна убавина раскажувајќи ја својата приказна на љубопитните туристи и случајните минувачи.

Chuseok ~ “Корејскиот ден на благодарноста“

Chuseok (추석) е еден од трите најбитни празници во Кореа заедно со Seollal ( Нова година ) и Dano ( петтиот ден од петтиот месец според лунарниот календар). Тој исто така е познат и под името Hangawi (한가위). Chuseok низ историјата бил денот кога земјоделците се заблагодарувале за годишната жетва, и го споделувале своето изобилие со семејството и пријателите. 

Chuseok се празнува на петнаесеттиот ден од осмиот месец според лунарниот календар. Оваа година празникот паѓа на 30 Септември и се празнува 3 дена, од 29 Септември до 1 Октомври. Овие денови луѓето ги користат да ги посетат своите родни места или пак да отидат на кратко патување.

Убавината на корејските ресторанчиња~

Доколку сакате да го почувствувате духот на корејската традиција пренесен преку храната ви препорачувам, доколку имате можност, да ги посетите малите локални корејски ресторанчиња. Во секој дел од градот може да наидете на мали симпатични места кои однавор ќе ви изгледаат можеби и малку застарено. Но во нив, можете да го почувствувате мирисот на зачините и состојките кои се приготвуваат речиси пред вас. Како и во повеќето азиски земји така и во Кореја, во традиционалните ресторанчиња можете да седите на подот. Јас бев фасцинирана од посетеноста на овие мали места во секој период од денот. Луѓето наминуваа сами или со своите пријатели споделувајќи ја храната. Корејците сакаат да ја делат храната со другите, затоа често ќе наидете на ресторани во кои главното јадење е на средината на масата и сите јадат од него. Ваквиот начин на јадење прави да се чувствувате поблиску до луѓето со кои ја споделувате храната. 

Што е Халју (Hallyu)?

Станува збор за еден интересен феномен кој се започнал во деведесетите. Имено, во овие години дошло до неверојатен подем на jужно корејската забавна индустрија и култура во останатите азиски земји. Ширењето на корејските драми и музика автоматски довело до ширење на самата култура. Халју е термин воведен од еден новинар од Пекинг кој бил фасциниран од овој феномен. Денеска, Халју или корејскиот бран се шири со огромна брзина насекаде во светот благодарение на корејската забавна идустрија. Се формираат фан клубови на корејските музичари, се одржуваат огромни концерти, популарноста на корејските драми и филмови се повеќе се зголемува низ целата планета. Ова издигнување на корејската забавна идустрија доведува до поголем интерес за Кореја, корејската култура и потпомага на економијата и политиката во самата земја. А корејците, топло ги поздравуваат сите странци кои се заинтересирани за нивната култура.  Интересно зар не? ^^*

* Патем, во последно време често се зборува за PSY кој исто така има свој придонес во корејскиот бран.....Gangnam Style ... звучи познато? ~.^