Авантурите на островот Џеџу! #1

Замисли: „ Го испи утринското кафе. Фрлаш замаглен поглед околу себе обидувајќи се да се прилагодиш на новата слика пред твоите очи. Синоќа беше во урбаната џунгла Сеул а денес, денес веќе си опкружен со нешто сосем поинакво. Малите куќички, зелените пространства и мирисот на море полека те обземаат. Не можеш да ја скротиш желбата за истражување, па има толку многу работи што сакаш да ги дознаеш. Само еден час со авион подалеку од Сеул а веќе си опкружен со сосем поинаков свет. Добредојде во Џеџу (제주도; Jeju)!

Вооружан со нетрпение го правиш првиот чекор кој те носи 2 милиони години наназад, до создавањето на островот. Пред тебе се протега огромно пространство вода кое немирно танцува вриејќи од жешката маса испратена од неговото тло. Во плитките води избива вулкан. Забрзано прелетуваш низ наредните милион години. Слоеви од лава и пепел се трупаат над немирната вода создавајќи остров. Подзастануваш на точката означена „пред 25 илјади години“, сите вулкани се стивнати. Лутината на земјата се фокусира во една единствена точка која избива создавајќи го најголемиот кратер, планината Хала. Го правиш вториот чекор. Стоиш на едно ридче набљудувајќи го брановитото море од зеленило пред себе. Ридестите конструкции пред тебе и каналите создадени од лава под твоето тло сведочат за насилното создавање на островот. Денес, на него има 360 мали ридчиња од изгаснати вулкани наречени Орум (오름; Oreum) доминирани од една голема конструкција позната како планината Хала. 

Планината Хала или Халасан (한라산; Hallasan)**? Зар тоа не беше највисоката планина во Јужна Кореја? Бинго! Ти навираат информации од некој ќошиња на мозокот. Висока е околу 1,950 m и често се крие во облаците. Во јаслите на планината се крие кратерско езеро наречено Пегногдам (백록담 ; Baengnokdam) за кое кружи легенда дека боговите се симнувале тука да си играат со срните. Сигурно изгледа прекрасно! Халасан комплетно доминира со островот. Од кратерот вивнат во облаците се протега се до синилото на морето нежно допирајќи го брегот. Не случајно низ островот се слуша изреката „ Џеџу е Халасан и Халасан е Џеџу“. 

** San (산)-на корејски значи планина ^^*

Со огромна задоволна насмевка на лицето се стрчуваш надолу по ридчето. Се нурнуваш во морето на жолти цвеќиња кој разиграно ги расфрлаат своите нежни ливчиња. Сѐ околу тебе е зелено и жолто и живо, размрдано и свежо. Го нема сивилото на големите метрополи и загушливиот воздух на секојдневието. За момент ги полниш белите дробови со мирисот на морето доставен од ветерот. Можеби рајот навистина изгледа вака. Без размислување прелетуваш до плажите. А таму, таму те чека една поинаква авантура! “