Убавината на корејските ресторанчиња~

Доколку сакате да го почувствувате духот на корејската традиција пренесен преку храната ви препорачувам, доколку имате можност, да ги посетите малите локални корејски ресторанчиња. Во секој дел од градот може да наидете на мали симпатични места кои однавор ќе ви изгледаат можеби и малку застарено. Но во нив, можете да го почувствувате мирисот на зачините и состојките кои се приготвуваат речиси пред вас. Како и во повеќето азиски земји така и во Кореја, во традиционалните ресторанчиња можете да седите на подот. Јас бев фасцинирана од посетеноста на овие мали места во секој период од денот. Луѓето наминуваа сами или со своите пријатели споделувајќи ја храната. Корејците сакаат да ја делат храната со другите, затоа често ќе наидете на ресторани во кои главното јадење е на средината на масата и сите јадат од него. Ваквиот начин на јадење прави да се чувствувате поблиску до луѓето со кои ја споделувате храната. 

Повеќето од овие ресторанчиња се специализирани за неколку видови јадење. На пример има места кои прават само риба и две-три други јадења. Исто така има и ресторанчиња кои се специализирани за месо. Во овие места на средината на секоја маса има поставено скара каде гостите сами си го приготвуваат јадењето. 

Во Кореа, поставеноста на масата е поинаква. Во еден целосн оброк не добивате прво салата, потоа супа па главното јадење....туку, го добивате главното јадење, супа, ориз и мали чинивчиња со кимчи, зеленчук, ролат од јајца, сушена морска трева.....итн. Овие мали чинивчиња се нарекуваат banchan и се неизбежен следбеник на секое јадење.^^ Нивниот состав зависи од ресторанот или главното јадење.

Не можам соодветно да ги пренесам импресиите од овие мали места исполнети со мирисот и вкусот на корејската традиција. Но се надевам дека ќе имате можност да ја почувствувате топлината на корејската гостопримливост. ^^*

P.s  Доколку уште се прашувате како успеваат да го консумираат оризот со стапчиња...време е да дознаете дека оризот, всушност, се јаде со лажица.